Mat 28 | MMX | STEP | Melemu at laaleng kaala, taba umaxantamak at laaleng avot ap mo luik, ne Maria Magdalene nedu mi lara ne Maria vetpes bok dugat pas ti ven lamaaut.

Matthew 28

Lorooro Xat Amlong At Ne Iesu

(Mk 16:1-10; Lu 24:1-12; Jo 20:1-10)

1 Melemu at laaleng kaala, taba umaxantamak at laaleng avot ap mo luik, ne Maria Magdalene nedu mi lara ne Maria vetpes bok dugat pas ti ven lamaaut.

2 La soso mene nga langne lolos ga vot, la laangelo at Leeme Silok ga vas si boro vana at laxalibet, gat pas ti lamaaut, la ga xavun kepe lavaruat at lamaaut la garat kis to mavana ren. 3 Levereven teren ga lok ngan lavanga i mam, la levesingsigaara ren gan bun aleng ngan lusugao. 4 Luvuttadi rutu mu diga marat aleng la diga dede la diga mer aroo.

5 La laangelo ga vaase ri lutkin keretna, “Nemen gat muta marat, aklen i dola nemu mu reven pupuse ri ne Iesu, no ga rem to at laxaba. 6 Ketla kopmen ta i de, no ira roo xat pam kerekngan levelinga ni ga tong i. Ude numu la muna ven loxot diga vaxamdi i ren. 7 Muna vas kaxat soso la muna tong i ri luvuttadi loklok ka anasa ren dola neni ira roo xat amlong pam basinge lanmet la no nga iramgo vam tidi uto Galili la dinaba ven ba i ve. La mo nga nia a tong pam i rinumu.”

8 Kuren la duga vas kaxat soso basinge lamaaut la duga umsu mi lanmarat, ketla duga umsu bok mi lomomo. Duga sixit soso ri tong i ri luvuttadi loklok ka anasa at ne Iesu. 9 La soso mun ne Iesu ga ru tangarang du la ga lok tidu, “Lenmila nak lok buru minumu.” La nedu duga vas li ren la duga rebeng tu at luxangkedek teren la duga lotu saparav i. 10 La ne Iesu ga lok tidu xeretna, “Nemen gat muta marat. Munat pas la muna tong i ri luvuttadi loklok ka anasa rak dola dinat pas uto Galili la dinaba ven ia ve.”

Lavapaase Asu At Luvuttadi Rutu Mu

11 At loxonaleng lutkin duga vas kaxat basinge lamaaut, mo luvuttadi esep diga reven tatao lamaaut, digamlong uto at lemenemen silok la diga tong asu levempanga axap diga ven i ri lavamaasa silok. 12 Lavamaasa silok diga vot buru mi loxongkulao silok la diga vit li lodoxoma la diga raba laxampilas solo ri nom luvuttadi esep. 13 La diga lok tidi, “Minaba tong i dola luvuttadi loklok ka anasa ren diga vot at laxanimin la diga nem kaka labantuxu ren at loxonaleng nemi miga unga. 14 Dola laradi gomgo, ne Paelat na ronga i na, nema maba vaase arepukus lodoxoma ren dola nemi mixo lok taxapmek at nai, la nemi guta doxoma mu solo i nom.” 15 Kuren la luvuttadi rutu mu diga lok ka nom levempilas la diga lox epovo levelinga diga tong taba di min. Kuren la ana lavapaase asu ira epeseves keneng at leme Judaia i se at na levenaleng.

(Mk 16:14-18; Lu 24:36-49; Jo 20:19-23; Gu 1:6-8)

16 Melemu lasangaun mi legesara luvuttadi loklok ka anasa ren digat pas uto at loxongkaana ro Galili no ne Iesu ga tong li i ridi. 17 La at loxonaleng diga ven i, diga lotu saparav i, ketla lentaba atdi levendoxoma atdi ga sixit ekarakat. 18 La ne Iesu ga vas saparap nedi la ga lok tidi xeretna, “Moroa gara raba vam ia mi lololos axap to vana laxalibet la de xopok at lavatbung menemen. 19 Kuren la mina onon la mina lox ase limixin at lengkot axap kusu diba ravasu ngan luvuttadi loklok ka anasa rak; la mina sep susu di mi laasen at ne Temen dik la ne Nitna eburu bok mi Loroonan Kaala. 20 La mina lox ase di xusu dinang tonga res at levelinga axap nenia agara tong pam i rinimi. La nenia anabak lox eburu amisik minemi naba se at laxavaxap at na lavatbung menemen.”